Ang nalalapit na Kapaskuhan ( Christmas is around the corner)

               Madami sa atin ngayon ang may kanya-kanyang preparasyon para sa darating na kapaskuhan. Mayroong pumupunta sa mga malls o iba`t-ibang lugar na may tiangge para lamang makahanap at makabili ng mga pang-regalo sa mga inaanak, kamag-anak, katrabaho, o iba pang mga mahal sa buhay. Unti-unti na ring nagmamahalan ang presyo ng mga pangunahing inihahanda sa pasko. Katulad ng hamon, keso de bola, at marami pang iba. Kapansin-pansin na din ang nag-gagandahang mga parol, christmas lights, at iba pang mga dekorasyon na nagsisimbulo sa nalalapit na pagdiriwang ng pasko. Tunay ngang napaka-busy ng mga tao kapag darating ang pagdiriwang na ito.

               Kadalasan nawawalan na rin sa isipan ng lahat ang tunay na kahulugan ng pasko. Mula sa wikang Ingles, ang pasko ay Christmas.Sa salitang ito, ating makikita ang pangalan na Siyang tunay na dahilan kung bakit natin taun-taon pinagdiriwang ang pasko. Si Jesus Christ na Siyang anak ng Diyos, bumaba sa lupa upang ,magkatawang-tao at iligtas ang nakararami sa kasalanan. Nang dahil sa pag-ibig mula sa Ama, walang pag-aatubiling inalay ni Hesus ang buhay Niya para sa lahat. Ang darating ng pasko ay isang pag-alala sa pagkapanganak ni Hesus. 

               Bago pa man tayo maliko sa  mga bagay na nakasanayan na natin sa pagdiriwang ng pasko, bigyan muna natin ng halaga at pansin ang anak ng Diyos na si Hesus, Gawing makabuluhan ang panahong ito sa pagbibigay ng pagmamahal sa ating kapwa at maging mas malapit sa Panginoon.